نكت رائعة

واحد شرا سلوقي يصيد بيه، ولكن الكلب غير يسمع صوت البارود كيخاف ويهرب.
السيد قال ندي الكلب لموسم التبوريدة باش يولف على صوت البارود، ومشى ربطو حدا شي مراوات.
واحد الوقت دا السيد الكلب معاه للصيد، وغير ضرب حجلة والكلب سمع الصوت، وهو يطلق تزغريدة





واحد المرا قالت لراجلها: شوف الحاج جارنا من كتر ما كيبغي مرتو، ملي ماتت بنى جامع بسميتها.
قال ليها راجلها: والله حتى أنا راني شاري الأرض من شحال هادي، خاصك غير نتي طلقينا لبني






سولوا واحد: كيفاش كنقولو ساهلة ماهلة بالفرنسية؟
قال ليهم: facile macile







واحد المكلخ مشى يشري صباط.
سولو مول المحل: شحال كتلبس ف رجليك؟
قال ليه المكلخ: جوج فردات.






واحد المكلخ كان سهران ف دار صاحبو، وملي بغى يمشي لدارهم، لقى الشتا كتصب.
قال ليه صاحبو : غير بات عندي اليوم، الدنيا هانية. ومشى للكوزينة يوجد أتاي
ملي رجع، لقى المكلخ كله فازك وهو يسولو: منين جاك هاد الما؟
قال ليه المكلخ : غير مشيت لدارنا جبت بيجامة ورجعت





واحد المرا طلعات للطوبيس هازة ولدها الصغير
شاف الشيفور ف ولدها وقال ليها: هادا أخيب ولد شفتو ف حياتي
المرا طلعات للطوبيس غضبانة وبقى فيها الحال بزاف
جلسات حدا واحد الراجل وقالت ليه: هاداك الشيفور قلل من قيمتي
قال ليها الراجل: سيري ليه وطلبي منو يعتادر ليك، وأنا غادي نشد ليك القرد ديالك






واحد جاتو الفاكتورة ديال الما غالية بزاف
عيط للشركة ديال الما قال ليهوم: أهياوينا، ياكما الشتا هاد العام على حسابي؟







هدا واحد خينا مبوق مع راسو جاه الرد
ملي شعل العافية ودفى مزيان، عجبو الحال، وهو يقول: الله! لهلا يحرمنا منها لا دنيا ولا آخرة.






هادو جوج بنات وحدة زوينة ووحدة خايبة تقدموا لشركة بطلب باش تكون وحدة فيهم سكرتيرة
مشاو لعند المدير وقال ليهم: أنا ما كيهمنيش الجمال، أنا كتهمني الكفاءة. غنسول كل وحدة فيكم سؤال باش نشوف شكون اللي تستاهل الخدمة.
سول البنت الزوينة: ماهي بلد المليون شهيد؟
قالت ليه: الجزائر.
قال ليها: ممتاز.
و هو يسول الخايبة: ما هي أسماء المليون شهيد؟







هادو تلاتة زقرامين قرروا يتبرعوا بشوية من فلوسهم حيت كترات عليهم الهدرة

قال ليهم اللول: غادي نرسم واحد الدائرة و نلوح الفلوس من الفوق. الفلوس اللي طاحوا ف الداخل ديال الدائرة ديالي. و الفلوس اللي يطيحوا ف برا الدائرة غادي نتصدق بيهم

قال ليهم التاني: أنا غادي نرسم واحد الخط و نلوح الفلوس من الفوق. الفلوس اللي طاحوا على ليمن ديال الخط ديالي، و اللي طاحوا على ليسر ديال الخط نتصدق بيهم

ناض التالت قال ليهم: أنا غادي نلوح الفلوس من الفوق. اللي طاحوا ديالي و اللي بقى ف السما نتصدق بيه